Mamit 19th January, 2023 : Er. H. Lalzirliana, Mamit Bialtu MLA chuan vawiin khan Patient Attendants' Shelter (damlo awmpuitute khualbuk) khuallian niin a hawng.

Khuallian chuan kan District mamawh em em Patient Attendants' Shelter hawn theih a ni chu lawmawm a tih thu sawiin a thawktu Department chungah lawmthu a sawi a. District chhung mipuite'n tangkai taka an hman ngei a beisei thu a sawi. Kan ram hmasawnna ruhrel siamna pawimawh tak Langkaih Balu kan District-in kan nei chu kan vannei hle a ni tiin Mamit to Bairabi, tun hnai lawka National Highway a puan a ni chu thil lawmawm tak a nih thu sawiin Mamit mipuite tan hmasawnna hnar pawimawh tak a nih ngei a beisei thu a sawi bawk.

Kan ram leh hnam tan thil tangkai turah kan ngaihtuahna seng a, thil zawng zawnga inrawlh lo turin kalkhawmte a chah a, kan tha leh zung senna kawngah kan fimkhur thiam a pawimawh thu a sawi. MLA hian khualbuka awmte chhiar tur lehkhabu a hlan nghal bawk a ni.

He hunah hian Pu Lalnunhlua, Mamit District Bawrhsap bakah Dr. Vanlalzuata, DMS, Mamit te'n thu an sawi bawk.

Pu Malsawmzuala, Project Director, DAY-NULM, UD&PA Deptt. chuan technical report pein Patient Attendants' Shelter sakna atana Project cost chu Rs. 33.80 lakhs anih thu tarlangin February 2020 atanga sak tan a ni a. DAY-NULM hnuaia Shelter for Urban Homeless Component hnuaia sak a ni. Building chhungah hian khum 10 awmin mipa leh hmeichhe room a hrangin a awm bakah eirawngbawlna tur choka a awm nghal bawk. A chhung furnish nan UD&PA sum Rs.2 lakhs hman niin a enkawlna Operation & Maintenance (O&M) atan hian kum nga (5) chhung thlatin khum pakhat zelah Rs. 1000/- ruahman niin a enkawl zuina tur sum hi DAY-NULM-in a tum dawn a. Khualbuk hi DMS Mamit leh a Staff te'n an enkawl zui tura ruahman a ni bawk.

Damlo awmpuitute khualbuk hawnna hun hi Pu H. Lianzela, Director, UD&PA Deptt. & Mission Director, DAY-NULM chuan kaihruaiin kalkhawmte lawmna thu a sawi a. Shelter Management Committee te chu tha tak leh thianghlim taka Shelter enkawlzui turin a chah. Pu C. Sawihlira, DUDO, Mamit chuan lawmthu sawina a nei bawk. He hunah hian Mamit khawpui chhunga khawtlang hruaitu leh tlawmngaipawl aiawh, Sorkar Officials te bakah thutharthehdarhtute an tel a ni.