Aizawl 12th August, 2022 : India ram zalenna champha phak vawi 75-na lawmna atan Hon’ble Prime Minister, Narendra Modi chuan 12th March,2021 atang khan ‘Azadi Ka Amrit Mahotsav’- India ram zalenna hlimawm Kutpui a lo kalpui tan tawh a.

He Kutpui lawmna kal zel ah hian Urban Development & Poverty Alleviation Deptt. hnuaia Pradhan Mantri Awas Yojana (Urban) leh Swachh Bharat Mission (Urban) chuan Ministry of Housing & Urban Affairs thuchhuak bawhzuiin August ni 12, 2022 hian Aizawl Mahatma Gandhi lim bulah ‘Har Ghar Tiranga’ Campaign neiin ‘Cultural Event & Street Show’ a buatsaih.

He hun hmanna-ah hian Pu H.Lianzela, Director, UD&PA Deptt. chuan thu a sawi a. UD&PA Deptt. hnuaia Scheme hrang hrang kalpui tlangpui te leh hmalakna te sawi langin, “Har Ghar Tiranga’ Campaign hian mipuite rilruah India ram hmangaih zualna te a thlen ngei a beisei thu te, India Flag chu hnam hrnag hrang min thuikhawmtu ber a nih thu a sawi a. India ram khua leh tui kan nih anga thanhnemngai taka ram tana thawk zel turin kalkhawmte a sawm bawk a ni.

He ‘Har Ghar Tiranga Street Show’ ah hian‘Chhawkhlei Cultural Club’ Pachhunga University College chuan India ram chhunga hnam hrang hrang inthuam dan leh hnam lam an entir a, zaithiam tak tak te sawm niin, PMAY (U)- Housing For All leh Swachh Bharat Mission (Urban) chungchangah Street Show hmuhnawm tak tak thlir ho a ni a.

He Street Show ah hian PMAY (U) beneficiaries ten insak tanpuina an dawn hnua an nun a inthlak danglam dante leh khawtlang ah pawh rual pawl zawka an awm dan te pholan a ni a. Tin, Swachh Bharat Mission (Urban) hnuaia Open Defecation Free Plus ni tura vantlang inthiarna vawn thianghlim leh enkawl fai pawimawhna te, Sorkar laipuiin Single Use Plastic a khap chungchanga inzirtirna te bakah Mizoram khawpui fai inelna 1st August – 31st December, 2022 chhunga hman mek chu mipui hriat turin pholan a ni. Pu Malsawmzuala, Joint Director (Admin) in kalkhawmte hnenah lawmthu sawiin a tlangkawmna thu a sawi a ni.

Independence Day August ni 15 ah hian UD&PA Deptt. chuan PMAY (U)- Housing For All Beneficiaries te nen Mizo High School Field, Mc Donald Hill ah ‘Kite Festival’ a huaihawt bawk dawn a, he ‘Kite Festival’ ah hian ‘Letter to the Soldiers of India’ tih thupui hmanga ‘Letter Writing Competition’ leh ‘Affordable Housing’ tih thupui hmanga ‘Drawing Competition’ a telte hnenah lawmman leh ‘Certificate of Participation’ an hlan ang.