• Title: Inaugural function of Multi Level Car Parking at Mizoram New Capital Complex(MINECO)

  • Aizawl, 21st December, 2021: Vawiin hian MINECO, Khatla, Aizawl a Multi Level Car Parking UD&PA Department-in a sak chu khuallian Pu Tawnluia, Deputy Chief Minister, UD&PA changtu in a hawng a.Deputy Chief Minister hi Minister K. Lalrinliana, MLA te- Prof. F. Lalnunmawia, Pu L. Thangmawia, Pu C. Lalmuanpuia, Pu Zothantluanga, Pu Zodintluanga, Pu Lalchhuanthanga ten an tawiawm a ni.A hawnna inkhawm hi Pu K.Lalthawmmawia, Secy, UD&PA in kaihhruaiin, hunserh Rev. T.Lalthantluanga, Chawnpui Bial Pastor-in a hmang a, Technical Report Pu HVL Zarzoenga, Joint Director(P), UD&PA Deptt., in a pe a ni. He programme-ah hian Car Parking inhlanchhawnna neih nghal a ni a, UD&PA Department aiawhin Pu K.Lalthawmmawia, Secretary, UD&PA in GAD changtu Additional CS, Pu J.C. Ramthanga hnenah a hlan chhawng a ni. He hunah hian khuallian bakah Pu J.C. Ramthanga, Addl CS, Pu Lalmalsawma Pachuau, Secretary, Planning Department leh midangten thu an sawi a, UD&PA Department Director Pu H. Lianzela’n lawmthu sawiin hun a khar a ni. Multilevel Car Parking, MINECO, Aizawl sakna tur hi kum 2017 khan Govt. of India, Ministry of DoNER (NLCPR) atangin Rs. 3601.00 lakh hmuh a ni a, Nodal Department chu Planning & Programme Implementation Department niin, Implementing Department chu Urban Development & Poverty Alleviation Department a ni. Contractor tur hi Turnkey basis-a thawk turin Open Tender kaltlanga zawn a nih hnuah Vikas & Associates, Delhi chu thlan a ni. Multi Level Car Parking hi Motor parking atana hman tura duan niin, July ni 12, 2018 khan a lung phum a ni. Contractor hian hna hi tluang taka thawkin hnathawh zawh hun chhung tur hi kum 2 chhung ruahman a ni a, amaherawhchu he project hi Turnkey contract a nih angin Contract award a nih hnuah Soil Investigation leh Design te hi Contractor-in an buaipui avangin a building sak hna hi a ti muang ta deuh hret a. Chumai bakah COVID-19 hrileng avangin duh ang leh beisei anga chakin hna hi an thawk thei ta lo bawk a, zawh hun tura ruahmanah tak an zo thei ta lo deuh a, September 30, 2021 khan zawh fel a ni ta a ni. He Multi- Level Car Parking hi tun dinhmunah Mizorama Motor dahna atana siam tawh zinga a lian ber leh dawng hlawk ber a ni a, chhawng kua (9 floors) awmin Motor(LMV) 354 leh 2 wheeler 224 leng thei tura ruahman a ni. Tin, floor inkalpawhna atan hian stair case leh motorable ramp (meter 6-a zau) bakah lift dah tel a ni. Hemi bakah hian he building leh Secretariat building kea inkal pawhna atan Pedestrian Steel Bridge siam tel a ni bawk. Floor pakua-ah hian floor riat te hi parking atan hman tur a ni a, a chung ber floor kua-na hi Food Court, Drivers’ Room leh Office atan buatsaih a ni. He car parking building-ah hian Fire fighting system-te, Tuizem 1,60,000 litres capacity, Transformer 100 KVA, DG Set 100 KVA, Domestic water supply atan tuizem 35,000 liters, Wash room unit 16 (Ladies & Gents) dah a ni a. Heng bakah hian parking management atana mamawh Toll Booths, Security/Control Room, Administrator Room, Pump Room, Electrical Room leh Management Office dah tel a ni. Multi Level Car Parking hi Secretariat leh a chhehvela Office hrang hrangte dawr tur leh a thawkte tana a pawimawh em avangin tangkai taka hman a nih beisei a ni a, General Administration Department, Govt. of Mizoram chu Sorkarin enkawl chhunzawm tura a tih angin an kutah hlan nghal a ni.
  • Venue: Mizoram New Capital Complex (MINECO),Khatla
  • Upload Date: 21.12.2021

Attachment

  • Loading attachment...