Urban Development & Poverty Alleviation Department-in kum 2017 atanga a lo buatsaih thin Mizoram Khawpui Fai Intihsiakna chu Swachh Bharat Mission (Urban), UD&PA hnuaiah kumin atan buatsaih leh a ni dawn a, vawiin khan a khuhhawnna hun 'Virtual Launching of Mizoram Cleanliness Competition 2022' chu Directorate of UD&PA, MINECO ah neih a ni. He Intihsiakna hawnna hun hi online-a neih niin, UD&PA Director leh Swachh Bharat Mission (Urban) State Mission Director ni bawk Pu H. Lianzela'n a kaihruai a, Pu Lalmalsawma Pachuau, Secretary, UD&PA chu khuallian niin, kum tina neih thin India ram khawpui fai endikna, Swachh Survekshan 2023 Toolkit Mizo Version leh Mizoram Khawpui Fai Intihsiakna 2022 endikna tur MCC-22 Assessment Framework te a tlangzarh a ni.

Pu Lalmalsawma chuan faina kawngah Mizoramin hmasawnna tam tak a neih tawh laiin hmabak tihtur tam tak kan la nei, a ti a.  UD&PA in ram chhung khawpui zawng zawng te tana faina kawnga inelna a buatsaih thin chu faina kawnga hmasawnna tura thil pawimawh leh tangkai a nih thu a sawi. Kan ram chhunga hmun nuam leh len khawthawvenna hmun kan neihte kan enkawl fai lo a, bawlhhlawh leh hnuam hnawk hmuh tur a tam hle, hemi kawngah hian hmasawn kan ngai, khuallian chuan a ti a. Single use plastic hman khap a ni chunga zawm a hlawh lo hle te chu ngaihpawimawh a tul a ti a. Leivung paihna hmun chungchangah pawh ngaihtuahna sen nasat a ngai tiin khawpui hrang hranga UD&PA thawktu tan la lehzual turin a chah. Pu Lalmalsawma chuan faina hi a Pathian thu a, mihring hriselna atan a pawimawh a, tourism thleng pawha thil tangkai a ni tiin, faina kawngah tan la leh zual turin kalkhawmte a sawm a ni.

UD&PA Director Pu H.Lianzela chuan faina lama hmalatu zawng zawng te faina kawnga mel lung thar phun tura sawmin, tourist hip thei tur khawpa khawpui fai nei thei tura tan la theuh turin a chah a. Vantlang zunin tihfai kawngah tan lak nasat a ngai a, kan enkawl zawh loh te chu thiat ngam mai tur leh a thar tur pawh DUDO/DPO leh Nodal Officer te phalna lo chuan saktir tawh loh mai ni se, tiin ODF+ tun thlenga kan la kai thei lo hi tan lak nasat a tul hle, a ti. Sawrkar laipuiin inkaihhruaina a siamah ODF+ kai thei lo te chuan SBM fund an dawng zui thei tawh dawn lo tih Pu H.Lianzela chuan a sawi bawk.  India rama State fai, mawi, thianghlim leh hrisel ber ni tura tang tura fuihin UD&PA Director chuan faina daihrei leh tlo nei thei tur chuan mi zawng zawngin mawh kan phur vek tih hre nawn leh turin mipuite a chah a ni.

Mizoram Khawpui Fai Intihsiakna 2022 hi August ni 1 atanga December ni 31, 2022 chhunga neih tur a ni a. Kum danga la tih ngai loh online assesment telh thar a ni a,  August atanga October chhungin 'Online Assessment' neih tur niin November leh December thla chhungin endiktuten a hmun hma a taka tlawhin 'Onfield Assessment' neih a ni ang.

Kumin intihsiakna-ah hian Mizoram khawpui (Notified Towns) 28 te Category 3 ah then hran an ni a. Category-1 ah hian Aizawl khawpui chhunga AMC Ward hrang hrangte an intihsiak anga. Category-II ah hian District Headquarters sawm te an tel ang a. Category III ah khawpui dang zawng - Vairengte,Tlabung, N. Kawnpui, Thenzawl, N. Vanlaiphai, Darlawn, Zawlnuam, Biate, Khawhai, Sairang, Lengpui, Bairabi, West Phaileng, Kawrthah, Ngopa, Phullen leh Farkawn te an tel a ni.

Category tinah hian lawmman pakhatna atanga pathumna siam a ni a, hei bakah hian Category tin atangin Best LC/VCs thlanchhuah an ni ang a, Fastest Mover Awards pawh a awm bawk ang.

Ministry of Housing & Urban Affairs in kum tina rampum huap khawpui fai endikna a kalpui thin Swachh Survekshan atana Mizoram khawpuite inbuatsaihna tura duan, Mizoram Khawpui Fai Intihsiakna result hi nakum January 2023-ah puan a ni ang.